0

Mini 40 Minute/4 Gou-Regla

Di zwe lösche Hììmmätch si ùs üser Sicht nit grad guet glüffe. Schlümmer no, ì hana mini auti 40 Minute / 4 Gou Regla ommi müesse awende (zwü mau!). Dì besììt, dass wemmer na zwüne Drittle mit vier oder meh gou hinder si, ì denn hììm gange (oder witers, je nachdäm). Bi drüne Gou ligti no a Verlängerig dinne, bi 4 ischs vorbi. Mi Paps hets eppa gliich wien ì. Wes a so lùùft wie am Friitig oder Ziischtig, isch ifach o mau gnueg, da glubemer ana kììs Wunder meh (zmündescht a däm Aabe).

O mis Mami wììs denn aube dass de Paps fürds löschta Drittù nümme bliibt ù eppa scho ùfem Hììmwäg isch. Natürlich gits nai am nächschte Match as paar blödi Sprüch oder Whatsapps va Lüt wa gseh dasmer nüme da si, aber daschja üs de würkli gliich (ù die Whatsapps chä de o usgrächnet va däne lüt wo inisch im Jahr ids Stadion chä u eppa no iglade sin).

I mache über 10'000km im Jahr mitùm Zug oder Outo um ds Fribourg d'Hììmmätch ds gseh, ì chume ù gange weni wott. Mittlerwiile zieht mini Regla no zümli i üsum Egge, ù wemmer ommi mit 4 gou hinderi sin, würta fliissig konsultiert ob ìtz de Nachbar blibt oder nìt (oder sie gsehs scho voruus das dFasle auwä gäh, ù verabschiede sich va üs scho mau prophylaktisch). Dascha bis lösch Jahr o kìs Problem gsi, itz hani plötzlich aber Gägewind. Mini Verlobti fünt das nit ok, ifach so scho as Drittù früher zgah. Das sigi vor de Gägner kapituliere.

Ù was we dSpieler, bsùndersch de Abplanalp, gseh, dass mer gange si, di näh das sicher persönlich fündt si. De Deal isch ifach itze, das ì o oni sia hììm gange, si nümmt de ifach de Zug hììm. Ù we si gliich gliichzitig mit hììm chunnt, tafi aber nit ständig Teletext gugge. Macht Sinn, chamu mache. Mir wenes ja schüsch no fasch gliich zwarte, aber de Typ wo dNudle macht bi de Stäge vor de Patinoire isch äbe denn aube o nüme da. Jedefaus, gäge Lausanne büni nai emù o hììm, mitùm Verspräche dassmer de defür am Fritig Chloote ailaa, mündeschtens as 8-1. Auso Manne, I wetti ommi mau d'Lyoba singe, gwünnet mor.

Kommentare zu diesem Artikel